Saturday, January 3, 2015

ನನ್ನೊಳಗೊಬ್ಬನ ಹುಡುಕುತ್ತಾ

ಇದೀಗ ಆಧ್ಯಾತ್ಮ, ನೈತಿಕತೆ ಅಂದುಕೊಂಡು.. ಹ್ಯಾಕ್ ಸಾ ಬಿಲೇಡು ತಗಂಡು ಕುಯ್ತೀನಿ ಅನ್ನೋದು,
ಟೈಟಲ್ ನೋಡುದ್ ತಕ್ಷಣ ಗೊತ್ತಾಗಿರ್ಬೇಕು.
ಬರೆಯೋದಕ್ಕೆ ಹೊರಟಿರೋದು ಕೂಡ ಅದರ ಬಗ್ಗೆಯೇ….
ಹುಡುಕ್ತಾನೆ ಇದ್ದೇನೆ. ನನ್ನೊಳಗಬ್ಬನು ಎಲ್ಲಿ ಅಂತ. ಬದಲಾಗುತ್ತಲಿರುವ ನನ್ನವೇ ಮೌಲ್ಯಗಳ ಡೆಲ್ಟಾಗಳನ್ನು .. ನೋಡಿ ಒಮ್ಮೊಮ್ಮೆ ಕಂಗಾಲಾಗುತ್ತದೆ.

ಕಳಬೇಡ, ಕೊಲಬೇಡ, ಹುಸಿಯ ನುಡಿಯಲು ಬೇಡ, ತನ್ನ ಬಣ್ಣಿಸಬೇಡ, ಇದಿರ ಅಳಿಯಲು ಬೇಡ ಅನ್ನೋದನ್ನ ಸಿನ್ಸೀಯರ್ ಆಗಿ ಓದಿ, ಕೇಳಿ, ಮೆಚ್ಚಿ  ಅಹುದುಹುದು ಎನ್ನುತ್ತಿದ್ದ ನನ್ನ ಪ್ರಜ್ನೆ…
ಇವತ್ತು ಇವೇ ಸಾಲುಗಳ ಮೇಲೊಂದು ಸ್ಟಾರ್ ಇಟ್ಟು , ಕಂಡೀಷನ್ಸು ಅಪ್ಲೈ ಅನ್ನುತ್ವೆ .  ನನ್ನ ಜೀವನ ಪ್ರೀತಿಯನ್ನೇ ಪ್ರಶ್ನಿಸುತ್ತವೆ.

ಸರಿ ತಪ್ಪುಗಳ ವ್ಯಾಖ್ಯಾನ!! ನನ್ನದೇ ಕಾಲದ ಜೊತೆಗೆ ಬದಲಾಗುತ್ತಾ ಬಂತಾ … ಅಥವಾ
ತಪ್ಪು ಅಂತ ಗೊತ್ತಾದ ಮೇಲೂ ಅದನ್ನು ಸಮರ್ಥಿಸಿಕೊಂಡು ಮುಂದುವರೆಯುವ  ‘ ಕರಪ್ಟ್- ಪ್ರೌಢಿಮೆ’ ಯನ್ನು ಇಷ್ಟು ದಿನಗಳ ಜೀವನಾನುಭವ ನೀಡಿತಾ …?
ಹಂಗಾದ್ರೆ ನಿಜವಾದ ಸರಿ ಯಾವುದು…? ಮತ್ತು ನಿಜವಾದ ತಪ್ಪು  ಯಾವುದು …?

ಸೆಕೆಂಡ್ ಪಿ-ಯು ಓದುವಾಗ….
ಬಹಿರಂಗಗೊಂಡಿದ್ದ  ಪ್ರಶ್ನೆಪತ್ರಿಕೆಯೊಂದನ್ನು ಹಿಡಿದು, ಅವಕ್ಕೆ ಉತ್ತರ ಹುಡುಕಿಕೊಡಬೇಕೆಂದು ಕೇಳಿ ಬಂದಿದ್ದ ಗೆಳೆಯನನ್ನು ಇಲ್ಲವೆಂದು ಕಳಿಸಿದ್ದೆ.
ಕಾರಣ!! ಉತ್ತರ ಹೇಳುವಾಗ, ಆ ಪ್ರಶ್ನೆಗಳನ್ನು ನೋಡಿ,  ಓದಿ, … ಪರೀಕ್ಷೆಯಲ್ಲಿ ಅವೇ ಪ್ರಶ್ನೆಗಳಿಗೆ ಉತ್ತರ ಬರೆದು …, ಪಾಪಪ್ರಜ್ನೆಯಲ್ಲಿ ಬದುಕಬೇಕಾಗುತ್ತದೆಂಬ ತಪ್ಪು ಅನ್ನೋ ಭಯ.
ಮುಂದೆ ಇಂಜಿನಿಯರಿಂಗು ಬರುವಷ್ಟರಲ್ಲಿ ಇಂತದೆಲ್ಲಾ ತಪ್ಪು ಅನಿಸಲಿಲ್ಲ.
“ಹೇ!! ಎಜುಕೇಷನ್ ಸಿಸ್ಟಮ್ ಸರಿಯಿಲ್ಲ.. ಇಲ್ಲಿ ವಸ್ತುನಿಷ್ಠವಾಗಿ ಒಬ್ಬರ ಪ್ರತಿಭೆಯನ್ನು ಅಳೆಯೋದಿಲ್ಲ” ಅಂತ ತಪ್ಪಿಗೆ ಸಮಜಾಯಿಷಿ ಕೊಡುವಷ್ಟರ ಮಟ್ಟಿಗೆ ನನ್ನ ಪ್ರಜ್ನೆ ಪ್ರೌಢಿಮೆಯನ್ನು ಪಡೆದಿತ್ತು.
ಇಲ್ಲಿ ತಪ್ಪಿರುವುದು ನನ್ನ ಕರ್ಮದಲ್ಲಿ. ಅದನ್ನು ಸರಿಯೆಂದು ಸಮಾಧಾನಿಸಲು ಹೋಗುವುದೂ ಕೂಡ ಕರ್ಮದ ದಾರಿ ತಪ್ಪಿಸುವಿಕೆ.

ಬಹುಷಃ ಎಲ್ಲಿಯವರೆಗೂ ಯಾವುದೇ ಕ್ರಿಯೆಗೆ!! ಶಿಕ್ಷೆಯ ಭಯ ಬಾಧಿಸುವುದಿಲ್ಲವೋ …, ಅಲ್ಲಿಯವರೆಗೂ ಎಲ್ಲಾ ವಿಧದ ಅಲೌಡ್ ತಪ್ಪುಗಳನ್ನು ಮಾಡಬಹುದು ಎಂಬುದಾಗಿ ವಾದಿಸಿ ಸಮರ್ಥಿಸಿಕೊಳ್ಳುವ
‘ಕರಪ್ಟ್- ಪ್ರೌಢಿಮೆ’ ದಿನದಿನದ ಜೊತೆಗೆ ಜನಗಳಿಗೆ ಅಂಟಿಕೊಳ್ಳುತ್ತಾ ಹೋಗಬಹುದು.

ಹಂಗಾದ್ರೆ ಧೈರ್ಯ ಜಾಸ್ತಿ ಇದ್ದವ್ನು ಮತ್ತು ಅರಗಿಸಿಕೊಳ್ಳಬಲ್ಲವನು ಹೆಚ್ಚು ತಪ್ಪುಗಳನ್ನು ಮಾಡಬಹುದು. ಧೈರ್ಯ ಕಮ್ಮಿ ಇದ್ದಲ್ಲಿ ಭಯದ ನೆರಳಲ್ಲಿ ತಪ್ಪು ಅನ್ನೋದು ತಪ್ಪೆಂದು ಬಿಟ್ಟು ಬಾಳಬಹುದು. ಇವುಗಳ ಮಧ್ಯೆ ತಪ್ಪು ಯಾವುದು ಮತ್ತು ಸರಿ ಯಾವುದು.
ನಮ್ಮ ಮೌಲ್ಯಗಳು ಹೋದದ್ದು ಎಲ್ಲಿಗೆ.
ಮೌಲ್ಯಗಳು ಅನ್ನೋದಕ್ಕಿಂತ, ನಂಬಿಕೊಂಡು ಬಂದಿದ್ದ ಸತ್ಯ ಗಳ ಕಥೆ ಏನಾಯ್ತು..?

No comments:

Post a Comment