​ಮದುವೆಯಾಗಿ ಕಳೆದ ಎರಡು ಮಳೆಗಾಲ

'ಮನೆಯಿಂದ ದೊಡ್ಡೋರ್ ಯಾರೂ ಬರ್ಲಿಲ್ವಾ' ಅಂತ ಅನುಮಾನದಿಂದಲೇ ಆಹ್ವಾನ ನೀಡುತ್ತಾ ಹುಡುಗಿಯ ಚಿಕ್ಕಪ್ಪ!! ಪಂಜೆ ಮೇಲೆತ್ತಿ ಕಟ್ಟಿಕೊಂಡರು.

ಒಬ್ಬನೇ, ನನ್ನ ಕಜಿನ್ ಬ್ರದರ್ ಶ್ರೀಧರನ ಜೊತೆಗೆ ಮದುವೆಗೆಂದು ಹೆಣ್ಣು ನೋಡುವ ಶಾಸ್ತ್ರಕ್ಕೆ ಬಂದಿದ್ದೆ. ಮೊಟ್ಟ ಮೊದಲ ಅನುಭವ!! ದೊಡ್ಡವರು ಜೊತೆಯಲ್ಲಿ ಬರದಿದ್ದುದಕ್ಕೂ ಕಾರಣವಿತ್ತು. ಮನೆಮಂದಿಯೆಲ್ಲರೂ ಹುಡ್ಗಿ ನೋಡ ಹೋಗಿ, ಸಡಗರದ ರೀತಿ ಮಾಡಿ.. ಬೇಡ ಅನ್ನೋಕೆ ಆಗದಷ್ಟು ಇಕ್ಕಟ್ಟಿಗೆ ಸಿಗಿಸಿಬಿಟ್ಟರೆ ಅನ್ನೋ ಅಂಜಿಕೆ ಮತ್ತು ಸಂಕೋಚ.

ಬಲೆ ಬಲೆ ಅಂಬ್ರೆಲಾದಂತ ಹಳದಿ ಬಣ್ಣದ ಚೂಡಿ ಹಾಕಿದ್ದ ಭಲೆ ಭಲೆ ಹುಡುಗಿಯ ಆಗಮನ.
ಸಾಕಷ್ಟು ಬಿಸ್ಕತ್ತು ತುಂಬಿದ್ದ ತಟ್ಟೆಯನ್ನು ತಂದು, ಮುಂದೆ ಬಡಿದು ಹೋದಳು. ನಾನು ನನ್ನ ಕಜಿನ್ ಎರಡು ಬಿಸ್ಕತ್ತು ಎತ್ತಿಕೊಂಡೆವು. ಮನೆಯೊಳಗೆ ಸಾಕು ನಾಯಿಯೊಂದು ಬಂತು.

'ಸೋನು ಇಲ್ ಬಾ.. ' ಅಂತ ಹತ್ತಿರ ಕರೆದು, ತಟ್ಟೆಯಲ್ಲಿದ್ದ ನಮ್ಮ ಪಾಲಿನ ಬಿಸ್ಕತ್ತುಗಳಲ್ಲಿ ಎರಡನ್ನು ಆ ನಾಯಿಗೂ ಹಾಕಲಾಯಿತು. ಶ್ರೀಧರ-ನಾನೂ, ಮುಖ-ಮುಖ ನೋಡಿಕೊಂಡೆವು.

ಹುಡುಗಿಯ ಅಕ್ಕನ ಮದುವೆ ಆಲ್ಬಂ ಒಂದನ್ನು ತಂದು ಕೈಗಿಟ್ಟು!! ಪುಟ ತಿರುಗಿಸಿದಂತೆಯೂ ...
'ಹಾ.. ಇವಳೇ ಹುಡುಗಿ,ಇವಳೇ ಹುಡುಗಿ '
ಅಂತ ಯುಗಾದಿ ಚಂದ್ರನ ತರಹ ತೋರಿಸ್ತಿದ್ರು.

' ಮನೆಯಿಂದ ದೊಡ್ಡೋರು ಯಾರು ಬರ್ಲಿಲ್ವಾ .. ' ಅಂತ ಪದೆಪದೆ ಕೇಳುತ್ತಲೇ ಇದ್ದರು.

' ಲೋ!! ಇವ್ರು ಆಲ್ಬಂ ಕೊಟ್ಟಿರೋದೆ, ಫೋಟೊ ನೋಡ್ಕಂಡು ಎದ್ದೋಗ್ರಿ ಅಂತ. ಮತ್ತೆ ಹುಡುಗಿನೇನು ತೋರ್ಸಲ್ಲ!! ಅನ್ಸತ್ತೆ. ಸರಿಯಾಗಿ ನೋಡ್ಕಂಡ' ಅಂತ ಕೇಳಿದ ಶ್ರೀಧರ.

' ನೋಡಿದ್ದಾದ್ರು ಎಲ್ಲಿ !!.? ಬಿಸ್ಕತ್ ತಟ್ಟೆ ದಬಾರಾಂತ ಎತ್ತಾಕಿ ಹಂಗೆ ಹೋದ್ಲು.' ಅಂದೆ.

ನಮ್ಮ ಮೇಲೆ ಕರುಣೆ ಬಂತು ಅನ್ಸತ್ತೆ!! ಹುಡುಗಿಯನ್ನು ಅವರ ಚಿಕ್ಕಮ್ಮನ ಸೆಕ್ಯೂರಿಟಿ ನಲ್ಲಿ ನಮ್ಮ ಮುಂದೆ ಕೂರಿಸಿದರು.

ಒಂದೈದು ನಿಮಿಷ ನೋಡಿದ್ದಷ್ಟೇ!! ಅವರ ಚಿಕ್ಕಮ್ಮ .. ಹುಡ್ಗಿಯ ಒಂದಷ್ಟು ಗುಣಗಾನ ಮಾಡಿ ಒಳಗೆ ಕರ್ಕೊಂಡು ಹೋದ್ರು.
ಹುಡುಗಿ ಜೊತೆ ಪ್ರೈವೇಟ್ ಆಗಿ ಮಾತಾಡಿದ ಮೇಲಷ್ಟೇ.. ನಾನು ಮದ್ವೆಗೆ ಒಪ್ಪೋದು ಅಂತ ಮೊದಲೇ ಹೇಳಿದ್ದೆನಾದರೂ ... ಇಲ್ಲಿನ ಪರಸ್ಥಿತಿ ಪ್ರತಿಕೂಲವಾಗಿತ್ತು. ನಾನೆಲ್ಲಾದ್ರೂ -
'ಒಂದ್ ನಿಮಿಷ ನಿಮ್ ಹುಡ್ಗಿನ ಸೈಡಿಗೆ ಕಳುಸ್ತೀರಾ, ಮಾತಾಡ್ಬೇಕಿತ್ತು!!' ಅಂದಿದ್ರೆ ಖಂಡಿತ ಕಳುಸ್ತಾ ಇರ್ಲಿಲ್ಲ.

ನಾವು ಬಂದಿದ್ದಕ್ಕೆ ಇಷ್ಟೇ ಸುಂಕ ಅಂತ, ಎದ್ದು ಬಂದೆವು.

​*****  *****​

ಮದುವೆಯೇ ಬೇಡ ಅಂತಿದ್ದವನಿಗೆ -
' ಸುಮ್ನೆ ನೋಡಿಕಂಡ್ ಬಾ!! ನೋಡಿದ್ದವೆಲ್ಲಾ ಆಗಿಬಿಡುತ್ತಾ!! ನಾವೇನು ಒತ್ತಾಯ ಮಾಡಲ್ಲಪ್ಪಾ. ಬೇಡ ಅಂದ್ರೆ ಬೇಡ!! ಶಾಸ್ತ್ರ ಸರಿ ಬಂದಿಲ್ಲ ಅಂತ.. ಯಾರಿಗೂ ಮುಖಚಟ್ಟು ಆಗದಂಗೆ.. ಕ್ಯಾನ್ಸಲ್ ಮಾಡ್ತೀವಿ.' ಅಂತ ಹೇಳಿ ದಬ್ಬಿದ್ದಳು ಅಮ್ಮ.

ಹುಡುಗಿ ಹೆಂಗಿದಾಳೆ ಅಂತ!! ಕೇಳಿದಾಗ..
' ಚೆನ್ನಾಗಿದಾಳೆ' ಅಂದೆ. ಮದುವೆಗೆ ಒಪ್ಪೋಕೆ ಮುಂಚೆ ಮಾತಾಡ್ಬೇಕು ​ಅಂತಲೂ ​ಅಂದೆ.

ಇದಾಗಿ ಕೆಲವು ವಾರಗಳ ನಂತರ, ​ಹುಡುಗಿಯ ಮತ್ತು ಅವರ ಮನೆಯವರ ಸಕಲ ಡಿಟೆಕ್ಟಿವ್ ಕೆಲಸಗಳು ಪೂರ್ಣಗೊಂಡು... ಅನುಮತಿ ಸಿಕ್ಕು...  ಮೊಬೈಲು ನಂಬರುಗಳು ಸಿಕ್ಕು!!

ಐಸು ಕ್ರೀಮ್ ಪಾರ್ಲರ್ ನಲ್ಲಿ ಅನೌಪಚಾರಿಕ ಭೇಟಿ ಫಿಕ್ಸ್ ಆಯಿತು.

ಈ ಭೇಟಿಯ ಸಫಲತೆಗಾಗಿ, ಕೆಲವು ಸ್ನೇಹಿತರು ತಮ್ಮ ಅನುಭವಾಮೃತವನ್ನು ಧಾರೆ ಎರೆದಿದ್ದರು.

ಮದುವೆ ಅಂದ್ರೆ ಓಕೆನಾ..? ಅನ್ನೋದರಿಂದ ಮೊದಲುಗೊಂಡು...  ಮನೆಯವರ ಒತ್ತಾಯ ಇದಿಯಾ..?? ನಾನು ಮನಸ್ಪುರ್ವಕವಾಗಿ ಒಪ್ಪಿಗೆಯಾಗಿದ್ದೀನಾ..?? ಆಸಕ್ತಿಗಳೇನು ..?? ಜೀವನದ ಬಗ್ಗೆ ನಿನ್ನ ದೃಷ್ಟಿಕೋನವೇನು..??

ಇಂಥ ಕೆಲವೊಂದು ನಿರ್ದಿಷ್ಟ ಪ್ರಶ್ನೆಗಳಿಗೆ, ಉತ್ತರಕ್ಕಿಂತ ಹೆಚ್ಚಾಗಿ... ಮಾತುಕಥೆಗಳ ಮೂಲಕ ಜಡ್ಜ್ ಮಾಡುವ ಪ್ರಯತ್ನವಾಗಿತ್ತು. 

ನಾನು ಹುಡ್ಗಿನ ಮಾತಾಡುಸ್ಬೇಕು ಅಂದಾಗೆಲ್ಲಾ, ನಮ್ಮಮಂಗೆ ಭಯ!!

'ಏನೇನೋ ಕೇಳ್ಬೇಡ' ಅಂತ ಎಚ್ಚರಿಸುತ್ತಿದ್ದಳು.

' ನನಗಷ್ಟು ಗೊತ್ತಿಲ್ವಾ..!! ನನ್ನೇನು ಅನಾಗರಿಕ ಅನ್ಕೊಂಡಿದೀಯಾ.' ಅಂದ್ರೆ..

'ಆ ಥರಾ ಅಲ್ಲಪ್ಪಾ!! ಹುಡ್ಗಿ, ಇನ್ನು ಚಿಕ್ಕವಳು. ನಮ್ಮ ಹತ್ರ ಮಾತಾಡೋ ಹಂಗೆ!! ಅವಳಿಗೂ ಏನೇನೋ ಕೇಳಿ, ತಲೆ ತಿನ್ಬೇಡ. ಅವ್ರ ಮನೆಕಡೆ ಎಲ್ಲಾ ಒಪ್ಪಿದ್ದಾರೆ. ' ..  ಅಂತ ನನ್ನ ಈ ಐತಿಹಾಸಿಕ ಭೇಟಿಯನ್ನ ತುಚ್ಚವಾಗಿ ನೋಡಿದ್ದೂ ಅಲ್ಲದೆ, ಸಂಬಂಧ ಕ್ಯಾನ್ಸಲ್ ಮಾಡಿಕೊಳ್ಳದ ಹಾಗೆ ಪ್ರೆಶರ್ ಕ್ರಿಯೇಟ್ ಮಾಡಿದಳು.

ಮನೆಯಲ್ಲಿ ಮಾತೇ ಆಡದಂತಿದ್ದವಳು!! - ಮೂರು ಸ್ಕೂಟಿಗಳ ಚೂಟಿ ಹುಡುಗಿಯರ ದಂಡಿನ ಜೊತೆಗೆ ಐಸ್ ಕ್ರೀಮ್ ಪಾರ್ಲರ್ ಗೆ ಬಂದಳು.  ಇವಳನ್ನೇನ ​ಮನೆಯಲ್ಲಿ ನೋಡಿದ್ದು ಅನ್ನೋ ಅನುಮಾನವೂ ಬಂತು. ಹುಡುಗಿಯ ಸ್ನೇಹಿತೆಯರೆಲ್ಲಾ​ ​ರಸ್ತೆಯಲ್ಲೆ​!!​ ನಿಂತು ವಿಷ್ ಮಾಡಿ ಹೊರಟು ಹೋದರು.​

ಅವಳು ಜ್ಯುಸ್ ಕುಡಿದಳು. ನಾನು ಗಡ್ ಬಡ್ ಐಸ್-ಕ್ರೀಮ್ ತಿಂದು ತಪ್ಪು ಮಾಡಿದೆ.

ನಾಲಗೆ ಸರಿಯಾಗಿ ಹೊರಳುತ್ತಿರಲಿಲ್ಲ.​ ಅದರಲ್ಲೂ, ನನ್ನ ಕನ್ನಡ ಅವಳಿಗೆ ಅರ್ಥವಾಗುತ್ತಿದ್ದುದೂ ಕಮ್ಮಿ!!

ಅಂತೂ-ಇಂತು ಅದೇನು ಮಾತು-ಕಥೆಯಾಯಿತೋ... 'ಬೇಡ' ಅನ್ನೋಕೆ ಸರಿಯಾದ ಕಾರಣ ಸಿಗಲಿಲ್ಲ. 

​

******​ ​****​**​

ನಮ್ಮ ಜೀವನದಲ್ಲಿ ಬಹಳಷ್ಟು ಜನಗಳನ್ನ ಭೇಟಿ ಆಗ್ತಾನೆ ಇರ್ತೇವೆ. ತುಂಬಾ ದಿನಗಳ ಅಥವಾ ವರ್ಷಗಳ ಮಾತು-ಕಥೆ, ಅನ್ಯೂನ್ಯತೆಗಳ ನಂತರವಷ್ಟೇ, ನಮಗ್ಯಾರೊ ಇಷ್ಟವಾಗ್ತಾರೆ. ಅವರುಗಳ ಜೊತೆ ಸ್ನೇಹ ಬೆಳುಸ್ತೀವಿ. ಪದೆಪದೆ ಸಿಕ್ಕು, ಹರಟಬೇಕು ಅನ್ಕೋತೀವಿ. ಇಲ್ಲವಾದಲ್ಲಿ!! ಎಷ್ಟು ಬೇಕೋ ಅಷ್ಟಕ್ಕೆ ಸೀಮಿತವಾಗಿಟ್ಟು!! ಯಾರ ಕೈಗೂ ಸಿಗದೆ ನುಲುಚಿಕೊಂಡು ಬದುಕುತ್ತೇವೆ.

ಅಂಥಾದ್ರಲ್ಲಿ, ಯಾರು ಅಂಥ ಗೊತ್ತಿಲ್ಲ. ಏನು ಅಂಥ ಗೊತ್ತಿಲ್ಲ ... ಮದ್ವೆನೇ ಆಗಿ ಹೋಗಿದೆ.
ಸಾಯೋತಂಕ ಒಬ್ಬರನ್ನೊಬ್ಬರು ನೋಡುತ್ತಲೇ ಜೀವಿಸುವ ಅನಿವಾರ್ಯತೆ.

ನೋಡಿ-ಮಾತಾಡಿ.. ಒಪ್ಪಿಯಾದ ಮೇಲಲ್ಲವೇ ಮದುವೆಯಾಗಿದ್ದು ಅಂಥ ಕೇಳಿದರೆ!!
'ಹಾ!! ಅದೂ.. ಸರಿ', 

ಆದರೆ, ಒಬ್ಬರನ್ನೊಬ್ಬರು ಮೆಚ್ಚಿಸುವ ಭರದಲ್ಲಿ ಅರ್ಥವಾಗುವುದಾದರೂ ಏನು..?

ಹಂಗೇ.. ಮದ್ವೆ ಅನ್ನೋದು... ಅಕ್ಕಿ ಸ್ಯಾಮ್ಪಲ್ ನೋಡಿದಂಗೂ ಅಲ್ಲ... ಮೊದ್ಲು ಒಂದ್ ಕೆಜಿ ತಂದು ಅನ್ನ ಮಾಡಿ, ಆಮೇಲಿಂದ... ಸರಿ ಅನ್ಸುದ್ರೆ ಒಂದು ಮೂಟೆ ಹೊತ್ತು ತರೋಕೆ...

'ಒಂದು ಚಾನ್ಸು ' ಅಂತ ಇಬ್ಬರೂ ತಗಳಲೆ ಬೇಕಿತ್ತು. 

ಆದರೆ.. ಅದೃಷ್ಟವಂತ ಅನ್ಸತ್ತೆ!! ಲಕ್!! ಇತ್ತು.
ಬಲಿಯಾಗಿದ್ದು, ಬಂಗಾರದಂತಹ ಹುಡುಗಿಗೆ(ಬಂಗಾರಕ್ಕಿಂತ ಕೆಳಗೆ ಅವರೆಲ್ಲಿ ಒಪ್ತಾರೆ, ಅಲ್ವೇ!! ).

ಇಬ್ಬರಲ್ಲಿ .. ಒಬ್ಬರೂ ಮತ್ತೊಬ್ಬರಿಗೆ ತಕ್ಕವರಲ್ಲ.

ಅವಳು, ತನ್ನ ದಶಕಕ್ಕಿಂತ ಹೊಸಬಳು, ಪ್ರಾಕ್ಟಿಕಲ್ ಹುಡುಗಿ!!

ಮನೆತುಂಬಾ ಜನಗಳು ಇರ್ಬೇಕು ಅಂತ ಆಸೆ ಪಡೋ ಸಂಘ ಜೀವಿ. 

ನಾನು, ನನ್ನ ವಯಸ್ಸಿಗಿಂತ ಜಾಸ್ತಿ ಹಳಬನೇ, ಸೊಲ್ಪ ಮೂಡಿ!!
ಆದಷ್ಟು ಒಂಟಿಯಾಗಿರಲು ಇಷ್ಟ ಪಡುವ ಭಾವಜೀವಿ.      

ಪರಸ್ಪರರು ಹಂಚಿಕೊಳ್ಳಬಹುದಾದ ಯಾವುದೇ ಸಮಾನ ಅಭಿರುಚಿಗಳಿಲ್ಲ.

ಹೀಗಿರುವಾಗ.., ಸಂಸಾರದ ನೌಕೆ ಮೀಯುತ್ತಿರುವುದಾದರೂ ಹೇಗೆ..?
  

***** *****

ನಾ.. ನು!! ಅಂದ್ರೆ ಜೀವ ಬಿಡ್ತಾಳೆ.   ಆ ಆಸೆಯ ಕಣ್ಣುಗಳು ಪದೆ ಪದೇ ಅಚ್ಚರಿಗೊಳ್ಳೋದನ್ನ  ಕಾಣುವುದಕ್ಕಾಗಿಯೇ... ನನ್ನ ಉಳಿದ ಆಯಸ್ಸನ್ನ  ರಿಸರ್ವ್ ಆಗಿ ಇಡಬೇಕು ಅನ್ನಿಸತ್ತೆ.

ಅವಳ ಹುಚ್ಚು ಪ್ರೀತಿಯು, ನನ್ನ ತಟಸ್ಥ ವಿಡಂಬನೆಯೂ - ಸರಸ!! ಸಮರಸದ ವಸಂತಗಳು ಮುಗಿದದ್ದು ತಿಳಿಯದಷ್ಟು ವೇಗ ಜೀವನಕ್ಕೆ. ಜಗಳ, ಮುನಿಸು, ಕೋಪ, ಕ್ರೋಧ, ಕಾಳಜಿ, ಪ್ರೀತಿ, ಮುದ್ದು - ಒಂದು ಜಾಯಮಾನಕ್ಕಾಗುವಷ್ಟು ಭಾವಗಳ ನಿಗಿನಿಗಿ ತಿಕ್ಕಾಟ.

ನನ್ನ ಬಗ್ಗೆ ತುಸು ಹೆಚ್ಚೆ ಅರ್ಥ ಮಾಡಿಕೊಂಡಿರುವಂತಿದೆ. ಏನಾದರೂ ಒಂದು ಇನ್ಸಿಡೆಂಟ್ ಹೇಳುದ್ರೆ ಸಾಕು... ಅರ್ಧದಲ್ಲಿಯೇ ತಡೆದು -​ ​
'ಹಿಂಗ್ ಹಿಂಗೇ... ಮಾಡಿರ್ತೀಯ' ಅಂತ ಉಳಿದದ್ದನ್ನು ವಿವರಿಸಿ, ತಲೆಗೆ ಮೊಟಕುತ್ತಾಳೆ.

ಒಂದು ಕ್ಷಣ, ಸಂಸಾರವೆಲ್ಲಾ ತಿಳಿದವಳಂತೆ, ಮನೆ ಯಜಮಾನಿಯಾಗುತ್ತಾಳೆ.
ಮತ್ತೊಂದು ಕ್ಷಣ ಮುದುಡಿ ಹೋಗಿ, ಮುದ್ದಾಗಿ ಎಳೆ ಮಗುವಿನಂತೆ ಕೈಯೊಳಗೆ ಕಳೆದು ಹೋಗುತ್ತಾಳೆ.

ಒಂದು ಕಡೆ ಪೈಸೆ ಪೈಸೆ ಉಳಿಸಿ, ಮುಂದಿನ ಜೀವನದ ಬಗ್ಗೆ ಅತಿಯಾಗಿ ಯೋಚಿಸುವಂತೆ ನಟಿಸುತ್ತಾಳೆ,
ಮತ್ತೊಂದು ಕಡೆ ಈ ಕಿತ್ತೊಗಿರೊ ಬೈಕ್ ಯಾವಾಗ ಬದಲಿಸ್ತಿರಾ ಅಂತಾಳೆ.

ನಾ ಕಂಡುಕೊಂಡಂತೆ... ಅಮ್ಮನಿಗೂ-ಮಡದಿಗೂ ಇರುವ ಒಂದು ಸಾಮ್ಯತೆ ಅಂದ್ರೆ -
ಇಬ್ಬರೂ ಪ್ರಶ್ನೆ ಮಾಡುವವರೇ...
ವ್ಯತ್ಯಾಸ ಅಂದ್ರೆ -
ಒಬ್ಬರು!!(ಅಮ್ಮ) ಏನೇ..  ಉತ್ತರ ಹೇಳಿದ್ರೂ ನಂಬುತ್ತಿದ್ದರು.

ಇನ್ನೊಬ್ಬರು!!(ಮಡದಿ) ಏನೇ ಉತ್ತರ ಹೇಳಿದ್ರು.. ತಿರುಗ ಅದಕ್ಕೆ ಮತ್ತೊಂದು ಪ್ರಶ್ನೆ ಕೇಳ್ತಾರೆ.
ಟೈಮ್ ಮತ್ತು ಸ್ಪೇಸ್ ನಲ್ಲಿ ಟ್ಯಾಲಿ ಆಗದೆ ಇರೋ ಎರಡು ಉತ್ತರಗಳನ್ನ ನನ್ನಿಂದಲೇ ಕಕ್ಕಿಸಿ... ಸಿಕ್ಕಿಬಿಳುವಂತೆ ಮಾಡುವಲ್ಲಿ.. ಹೆಂಡತಿ ನಿಪುಣಳು.. ಶರಣಾಗದೆ, ಬೇರೆ ವಿಧಿ ಇರುವುದಿಲ್ಲ!! 😀

ಮದುವೆಗೆ ಮುಂಚೆ ಒಂಟಿಯಾಗಿದ್ದಾಗ.. ನಮಗೆ ನಮ್ಮದೇ ಆದ ಪ್ರೈವೇಟ್ ಸ್ಪೇಸ್ ಇರತ್ತೆ.

ಇಷ್ಟ ಬಂದಂಗಿರೋದು!! ಉಂಡಾಡಿಗುಂಡನ ಥರ!! ಮದುವೆ ಆದಮೇಲು ಕೂಡ ಅಂಥದ್ದೇನಾದ್ರು ಉಳಿದುಕೊಳ್ಳಬಹುದು, ಅಂತ ನಿರೀಕ್ಷಿಸಿದ್ರೆ.. ಅದೊಂದು ಮೂರ್ಖತನ.

ಈ ಸಂಸಾರದ ಮಾಯೆಯೊಳಗೆ ಕಳೆದೇ ಹೋಗಿರುವ ಭಯ, ಕೆಲವು ಸಾರಿ ಗಾಬರಿ ಹುಟ್ಟಿಸತ್ತೆ.
ಮತ್ತೆ ನನ್ನನ್ನ ಹುಡುಕಿಕೊಂಡು ಹೊರಟಾಗ.... 'ಬರ್ತಾ!! ಒಂದು ಲೀಟರ್ ಹಳದಿ ಪ್ಯಾಕೆಟ್ ಹಾಲು ತಗೊಂಡು ಬಾ' ಅನ್ನೋ ಹೆಂಡತಿಯ ಫೋನ್ ಕಾಲು, ಫ್ರೀ ಫಾಲ್ ತರ ಭ್ರಮೆಗಳನ್ನು ಕಳಚಿಸಿ ನೆಲಕ್ಕೆ ಹಾಕತ್ತೆ.

ಮದುವೆ ​ಮೂಲಕ​ ಶುರುವಾಗಿರುವ...  ​ ಹೊಸ ದಿಗಂತದ ಕಡೆಗಿನ ಪಯಣಕ್ಕೀಗ ಎರಡು ವರ್ಷಗಳ ಸಂಭ್ರಮ.

ಎರಡು ಮಳೆಗಾಲ ಮುಗಿಸಿರೋದು ಅಂದ್ರೆ ತಮಾಷೇನಾ!!